Fjordane Friluftsråd
HARDBAKKE: Solund Brygge
FLORØ: Horne Brygge
Postadresse
Fjordane Friluftsråd
Hardbakke 26
6924 Hardbakke
Org.nr.: 918 552 537
Telefon: 994 87 500
E-post: fjordane@friluftsrad.no
Fjordane Friluftsråd – kort fortalt
Solund • Askvoll • Kinn • Bremanger • Stad • Stryn
Fjordane Friluftsråd er ein interkommunal organisasjon starta opp i 2017. Arbeidet vårt skal bygge på at vi er eit samarbeidsorgan forankra i kommunane og fylket. Vi arbeider hovudsakeleg med planlegging, gjennomføring, organisering og førebyggande arbeid opp imot marin forsøpling. Vi vil også samarbeide med offentlege og private aktørar, slik at vi kan bidra med tilrettelegging for lågterskel friluftsliv.
Fordelar som medlemskommune
1. Lågterskeltilbod som aukar helse og livskvalitet.
2. Utløyser midlar til friluftsliv gjennom Friluftsrådenes Landsforbund sine ordningar.
3. Førebyggjande arbeid i skulen.
4. Friluftsskular for born og unge.
5. Stikk UT! – får fleire ut.
6. Stimulere til frivilleg innsats for natur og friluftsliv.
7. Hjelp til å bekjempe plastforureining i vassdrag og sjø.
8. Natur- arealforvalting og sikring av område til friluftsliv.
9. Fremje samarbeid mellom kommune og frivilligheit.
Hovudmålet er at alle skal få moglegheita til å drive friluftsliv som ein helsefremmande, trivselsfremmande og miljøvennleg aktivitet.
Våre aktiviteter
Marin forsøpling
Vi kan hjelpe med å organisere strandryddingsaksjonar, handtere marint avfall frå ryddeaksjonar, rapportere og kartlegge plastforsøpling i ditt område eller opprette førebyggande tiltak
Frivillige ryddeaksjoner er eit effektivt tiltak for å fjerne avfall frå naturen, både før og etter det har hamna på stranda. Jo oftare det blir rydda, jo meir avfall klarer vi å fange opp frå naturen. Friluftsråda arbeider tett saman med «Hold Norge Rent» med eit systematisk arbeid for å legge til rette for meir rydding i Norge. Langs kyst og i fjordstrøk av tidlegare Sogn og Fjordane er det Fjordane Friluftsråd som koordinerer all aktivitet knytt til marin forsøpling. Frå oss kan du få tips, hjelp til organisering og søke om midlar til gjennomføring av tiltak mot forsøpling.
Kva kan du gjere?
- Bli med på ryddeaksjon. Vi arrangerar jamnleg ryddeaksjonar og har ei oversikt liggande på Aktuelt.
- Organiser ein ryddeaksjon
- Organisasjonar/lag/skular kan søke motivasjonsmidlar om ein har idear i arbeidet mot marin forsøpling
Våre prosjekter
Ilag med våre samarbeidspartnarar har vi ulike prosjekt som skal redusere marin forsøpling og informere innbyggarar i medlemskommunane om konsekvensen av marin forsøpling.
Rydd Norge Vestland
Rydd Norge-programmet er etablert av Handelens Miljøfond og bli leia av Salt, og er Norges første omfattande og nasjonale ryddeprogram. Fjordane Friluftsråd er prosjektleiar for Vestland, og ryddelaget fjernar marin forsøpling langs kysten av medlemskommunane våre.
Rydd Sogn og Fjordane
Fjordane Friluftsråd, finansiert av MARFO, koordinerar strandrydding og førebyggande tiltak mot marin forsøpling. Vi dekker kysten og ytre fjordstrøk i «gamle» Sogn og Fjordane og medlemskommunane våre.
Vi kan hjelpe med å organisere strandryddingsaksjonar, handtere marint avfall frå ryddeaksjonar, rapportere og kartlegge plastforsøpling i ditt området eller opprette førebyggande tiltak. Vi har sett av motivasjonsmidlar i budsjettet som organisasjonar/lag/skuler kan søkje på om ein har idéar i arbeidet mot marin forsøpling. Det kan være strandryddingsaksjonar, opplæringsaktivitetar, temakveldar og andre førebyggande tiltak.
Aktivitetar for barn og unge
Friluftsskule
I sommarmånadane held vi Friluftsskule i medlemskommunane våre. Friluftsskulane er eit aktivitetstilbod for born og unge og skal gje dei ein enkel inngang til friluftslivet gjennom aktivitetar og leik. Friluftskulen går over tre dagar med ei overnatting. Tema på Friluftsskulane er allemannsretten, leiroppsett, ekspedisjon og kart og kompass. Under friluftsskule har du full oversikt over når vi arrangerer friluftsskule i ditt område.
Skuleturné for havet
Noko av det viktigaste vi gjer i arbeidet mot plast- og marin forsøpling er å inkludere og engasjere komande generasjonar om plastproblematikken. “Skuleturné for havet” arbeider med akkurat dette.
Formålet med turnéen er å skape engasjement og auke kunnskapen om kva plast er, kvar den kjem i frå, kva alternativ har vi til plast og korleis fase ut unødvendig bruk av plast. Vi vil også ta elevane med ut på strandrydding, der vi vil rydde, kartlegge ulike typar plast og registrere funn av plast på ulike databasar brukt til forsking. Turneen starta hausten 2021 og har hatt stor suksess. I løpet av skuleåret 2022-2023 skal vi fortsette turneen og besøke kommunar som tilhøyrer «gamle» Sogn og Fjordane. Vi vil drive med alt frå undervisning om plasten sitt miljøproblem og marin forsøpling i klasserommet, til å ta elevene med på faktiske ryddeaksjonar i strandsoner og vassdrag. Kombinasjonen av teori og praksis gir elevene god innsikt i miljøproblemet sin kompleksitet både lokalt og globalt.
Friluftsliv for alle
Fjordane Friluftsråd vil legge til rette for aktivitetar i naturen, og at folk skal bli glad i naturen rundt seg. Det er kjekt å sjå at dess meir folk brukar fritida si i naturen, dess meir blir dei opptekne av å ta vare på naturen.
Stikk UT!
Stikk UT! er felles turtrim for medlemskommunane i friluftsrådet og den mest populære turtrimmen i Noreg. Turtrimmen gjer det enkelt for alle å finne ein fin tur, og det er heilt gratis å delta.
I appen, eller på nettsida til Stikk UT! kan ein finne eit utval av flotte turar i kvar kommune. Turmåla er varierte, med turar frå fjell til fjøre, bratte og flate, lange og korte. Alle turane har ein god turbeskrivelse, og er godt merka. På kvart turmål vil det vere ein turkode som ein registrerar i appen.
Skjergardstenesten
Skjergardstenesten har ei sentral rolle i kampen mot marin forsøpling. Med M/S ARLENE skal Fjordane Friluftsråd i hovudsak drive med renovasjon, vedlikehald og skjøtsel av offentlege friluftsområde langs kysten. Vi hentar inn oppsamla marint søppel og eigarlause båtvrak, og for medlemskommunane rådgjev vi i arbeidet med tilrettelegging og utvikling av friluftsliv og båtliv i skjergarden. I tillegg tar vi også på oss transportoppdrag for både offentlege og private aktørar.
Med båten M/S Arlene vil vi gjere ein innsats for reiselivet – med tilsyn og vedlikehald av friluftsområde på stader med vanskeleg tilkomst.
